Aldair op heden voir den raide vand(er) stat gecomen es yde van/ haecht weduwe symoens wilen blanckart opdoen(de) hoe dat hue(r)/ voirmaels met testame(n)te henr(icx) wilen va(n) haecht geheete(n) vand(en)/ male heurs oems in puer(er) aelmoessen gemaect zij(n) seke(re) p(or)ceelen/ van goeden namelijc een huys en(de) hof inde dorpstrate opden hoeck/ van coelhem It(em) twee bosschen omtri(n)t iii(½) boender groot tophem onder/ de heerlich(eit) van lynden It(em) xxxvi roeden lants tophem onder pelleberch/ en(de) noch twee boender soe beemts soe boegarts oic tophem onder pelleberch/ gelegen op seke(re) co(m)me(re)n en(de) legaten aldair geruert En(de) hoe al eest soe dat/ zeder a(n)no lxxix maii xvi de voirs(creven) symoen huer man huer met sijnen/ testame(n)te maecte dat zij hebben en(de) houden soude en(de) v(er)volgen alle zijn/ goede beruerlijc en(de) omberuerlijc oft erflijc wair die bevo(n)den zijn oft/ bevo(n)den mochten wordden nae zijn doot te aenveerden te v(er)coepen te/ v(er)thie(re)n en(de) van dien tot huer(er) geluften te dispone(re)n behalven dat zij/ van en(de) uut dien betalen soude alle schulden bij hen symoene en(de) yden/ gemaect en(de) de kercken rechten (et)c(etera) Ende zij groote diverse schulden/ van co(m)me(re)n en(de) lasten uute(n) voirs(creven) goeden gaen(de) bij huers mans tijde en(de)/ aflivich(eit) dair op staen(de) en(de) oic diverse ande(re) schulden in huers mans/ tijde gemaect bevo(n)den heeft en(de) dae(re)nboven gehadt zee(r) sware lasten/ en(de) costen va(n) gedinge tegen ja(n)ne vand(en) male int gheestelike gerichte/ te luydick om de voirs(creven) goeden huer gemaect te deffende(re)n die welke huer/ niet moegelijc en zijn te vervallen sonder e(n)nige vand(en) voirs(creven) erfgoeden/ dair o(m)me te moeten vercoepen Soe en can zij niet vuechlijc gevinden/ coopman tot dien overmits dat hue(r) actie es van testame(n)te sonder/ dair toe te hebben(e) behulp en(de) bijstant vand(er) stadt met decrete d(air)mede dat/ geclaert wordde en(de) hue(r) geconsenteert e(n)nich porceel ten mynsten quetse/ en(de) ten meesten orboe(re) te moegen v(er)coepen om de vervoirs(creven) wettige schulden
//
en(de) nootlijke lasten d(air) mede te v(er)vallen op dat mits dien dande(re)/ goede met allen bijde selve crediteurs niet beschadicht v(er)reyct en(de)/ uutgewo(n)nen en wordden En(de) want den raide vand(er) stadt die h(ier)af/ oick eensdeels geadverteert en(de) versocht wart bij henr(icke) vand(er) horst/ als een vand(en) executeurs [va(n)] des voirs(creven) henr(icx) vand(en) male testame(n)te/ dit versuec op dat soe wa(r)e redelijc dochte en(de) op rechtverdich(eit)/ gefondeert Soe es bijden selve(n) raide geclaert nae dat zij/ verstonden dat dbosch gelegen boven ophem inden baenhovel/ omtrint iii(½) boender houden(de) zee(r) bes belast was dat de voirs(creven)/ schulden dair voe(r) tvoirs(creven) vercoepen geschien soude ierst geclaert/ wordden wat schulden het zijn aen wien men die sculdich es/ en(de) van wat tijden gemaect met oic den gewarige(n) costen van/ gedinge geschiet om de goede te bescudden en(de) eve(n)verre men die/ bevi(n)t wesen(de) van des voirs(creven) symoens [des] testame(n)tmakers tijde dat dan/ de voirs(creven) yde uut crachte vand(en) testame(n)te(n) en(de) met raide en(de) met/ consente vand(en) executeurs sal moegen v(er)coepen e(n)nich p(or)ceel ten my(n)sten/ quetse d(air)mede de selve schulden en(de) costen geco(n)tenteert wordden/ en(de) dat die onder de guedinge gecauseert wordden en(de) verclaert/ En(de) oft dair yet overt boven co(m)mer schult en(de) costen voirs(creven) dat men/ dat ae(n)leggen sal ter lijfrinten ten live va(n) yden en(de) hue(re)n sone et/ sup(er)stit(is) Behalven dat der moeder huer heffen en(de) oft die rinte/ afgequijt wordde dat men die weder [alsoe] ae(n)leggen soude in (con)s(ili)[o] opidi febr(uarii) xviii