Condt zij allen lieden dat gheert helschevier jans helschevier/ sone in p(rese)ncia heeft genomen en(de) bekint dat hij genome(n)/ heeft tegen symoen(e) boschvercken thoff desselfs symoens geheete(n)/ te raelebeke gelegen inde prochie va(n) houtheverle met allen/ den huysen en(de) den den landen en(de) allen toebehoirten sonder de oude schue(r) dair/ symon zijn helicht inne leggen sal en(de) den solde(r) bove(n) den scaep stal/ die sal symon te he(m)weerts behouden Te houden te hebben/ en(de) te wy(n)nen van half meye naestcomen(de) eene(n) termijn va(n) xii/ ja(r)en lang vervolgen(de) behalven dat zij van malcande(re)n sele(n) moegen/ scheyden te halve(n) tijde te weten(e) te vi ja(r)en behalve(n) dat de ghene die/ alsoe scheyden wilt dat den ande(re)n een half jair te vo(r)en sal cu(n)digen/Te houden te hebben elx jairs dae(re)nbynnen om en(de) voe(r) de helicht/ va(n) allen den vruchten dair op jairlix wassen(de) It(em) en sal de wy(n)ne/ in beyde vorste boende(re)n gheenen soecht hebben It(em) de wy(n)ne sal/ hebben de vorste doelege om zijn beesten dair inne te weydene/ by(n)nen en(de) des sal de wy(n)ne moeten den vrede houden dat in die/ ande(re) beemde gheen scade en geschiede en(de) des sal hij alle de willegen/ moegen tru(n)cken die inde vorste doeleghen staen en(de) niet voirde(r)/ It(em) de wy(n)ne sal de leydegrecht van aen de dijle veeghen tot/ aen den hasenborre toe en(de) alle de slippen comen(de) uuter doeleghen/ alsoe v(er)re als hij die houden(de) es sonder symoens cost It(em) de wy(n)ne/ sal hebben dat achterste boender beemts aen den hasenborre en(de)/ de vijf dach(mael) dair tegen coemen(de) lanx den velde tot aen zij(n) voirg(eruerde)/ eeusel elx jairs den voirs(creven) t(er)mijn due(re)nde om en(de) voe(r) xiiii pet(er)s/ te xviii [s(tuvers)] tres pl(a)c(cis) p(ro) stuf(ero) jairlix te half meye te betalen(e) quol(ibet) ass(ecutu)[m]/ It(em) symon sal hebben allet dooft s half alsoe v(er)re alst de wy(n)ne/ houden(de) es va(n) symoen(e) It(em) de voirs(creven) wy(n)ne sal hebben alle dlant va(n)/ goederthuys wijngart te loeven(e) weert al sonder dla(n)t dat jan traen houdt/ It(em) de wy(n)ne sal den rogge alle ja(r)e saeyen op zijn vier getidege/ vo(r)en en(de) hoolvoren oft noot wa(r)e om [de] pessemen uut te wy(n)nen ende/ tallen vo(r)en wel eggen en(de) mest tallen voren wel uut vueren die/ even(en) op twee voren en(de) de gherste op drie vo(r)en En(de) ten afscheyden(e)/ sal de wy(n)ne de brake o(m)me doen by(n)nen merts en(de) de messie oic uut/ vue(re)n ten lesten ja(r)e dairt symon believe(n) sal alsoe wel ten veersten/ als ten naesten It(em) sal de wy(n)ne alle ja(r)e twee boender stoppelrox sayen/ op twee voren en(de) een boender somerrox op drie voren En(de) de wy(n)ne/ saelt al s laten soet hier staet sonder den stoppel rogge die vant hij op/ een vore en(de) hij salder hem ii gheven die sal symon deene betalen It(em)/ de wy(n)ne sal alle ja(r)e saeyen (½) boende erten en(de) (½) boender rapen dair symo(n)/ de helicht af hebben sal It(em) de wy(n)ne mach vlas saeyen alle ja(r)e en(de) hij
//
moet voer symoen(e) oick lant gereyden dies moet symon tsaet/ leve(re)n It(em) de wy(n)ne sal den bruel inne vue(re)n sonder symoens cost/ It(em) de wy(n)ne sal alle ja(r)e leve(re)n xxx busselen walms om die huysen/ te decken(e) en(de) de wy(n)ne sal thien teen dacroeden vitselroeden en(de)/ leem nairde(r) halen en(de) alletghene datmen behoeft nairde(r) te halen totter/ rep(ar)acien sonder symoens cost des moet symon hem wijsen dair hijt/ halen sal en(de) de wy(n)ne sal den werclieden den cost gheven vander rep(ar)acien/ en(de) symon de dachue(re)n It(em) de wy(n)ne sal de huyse houden vander underster/ rijkelen nederweert sonder symoens cost It(em) de wy(n)ne mach doen/ maeyen alle ja(r)e in afslage va(n) zijne(n) weyghelde xii voederheyden/ maer dies moetse de wynne halen sonder symoens cost opde(n) bosch/ op datse symon niet en dade maeyen en(de) waert datse symon meer/ dade maeyen die sal hij oic sculdich zijn te halen sonder symoe(n)s cost/ It(em) de wy(n)ne sal alle de vruchten ter eerden leve(re)n sonder symoens/ cost en(de) symoens helicht inde schue(r) leve(re)n en(de) de wy(n)ne sal symoen(e)/ altijt dierste weder inne vue(re)n sonder symoens cost en(de) alst gedorsschen es/ sal die wy(n)ne symoens deel te loeven(e) leve(re)n dairt he(m) believe(n) sal en(de)/ dies moet symon de bande slaen en(de) met den waghen gaen en(de) die/ wy(n)ne sal hem den cost gheven It(em) de wy(n)ne es sculdich alle ja(r)e symoen(e)/ te loeven(e) te leve(re)n xvi loeve(n)sche wissen houts en(de) symon salse betalen/ op den hoeghen bosch It(em) oft symon yet gedae(n) woude hebben met zijne(n)/ waghene(n) en(de) peerden dat sal de wy(n)ne hem sculdich zijn te doen(e) in/ afslage va(n) zijne(n) weyghelde alst hem va(n) noode es It(em) de wy(n)ne sal hebbe(n)/ thouwen en(de) tru(n)cken alsoe v(er)re als hij de lande hout sonder op jans van/ opgheen dorp boender en(de) sonder opgaen(de) hout En(de) de wy(n)ne sal tcoren/ v(er)maken en(de) de strate(n) effene(n) en(de) veghen sond(er) symoens cost It(em) de wy(n)ne/ en sal niet voirde(r) houwen noch tru(n)cken dan hij v(er)maect en(de) de wy(n)ne/ sal ten leeste(n) ja(r)e bee(m)pde coolhof en(de) allet coren v(er)maect laten en(de) hij/ sal ten leste(n) ja(r)e eene(n) saeye(r) doen d(air) symon mede te vreden sal zijn sond(er) symoe(n)s/ cost It(em) de wy(n)ne en sal ten leste(n) niet meer moege(n) houwen oft tru(n)cken/ meer dan hij behoeft om mede te v(er)maken It(em) de wy(n)ne sal mette(n) selve(n)/ vrede sonder afhouwen v(er)maken aen bee(m)pde en(de) aen lant d(air) hij can It(em) hij/ en sal gheend(er)hande hout houwen noch tru(n)cken het en sal tijtveerdich zijn/ It(em) de wy(n)ne mach v oft vi dach(mael) stortte(n) om doen als den rogge af es en(de) d(air)inne/ raepsaet worpen om zij(n) oeyen en(de) die v oft vi dach(mael) sal hij ter gherste(n) driven/ en(de) saeyen It(em) hij sal alle ja(r)e mest vue(re)n sla(n)ts meeste(n) p(ro)ffijte alsoe wel te(n) veersten/ als ten naesten It(em) de wy(n)ne moet symoen(e) alle ja(r)e een rint wynte(re)n sonder zijne(n) cost/ It(em) symon en mach niet doe(n) dorssche(n) voir s(in)[te] m(er)te(n)smisse hen en wa(r)e voir zij(n) brootcore(n)/ en(de) hij mach oic gherste dorsschen om zij(n) vercken(en) mede mesten(e) en(de) niet meer/ It(em) de wy(n)ne moet hondert lijfscape houden int hof liggen(de) over jaer It(em)/ de wy(n)ne sal hebbe(n) een dach(mael) lants in de stortte voir ute niet vand(en) archsten/ noch vand(en) besten En(de) alle dese vorweerden (et)c(etera) cor(am) py(n)noc roela(n)ts febr(uarii) iiii/ Sen(entiatum) p(er) joh(ann)em daneels t(am)q(uam) p(ro)cu(r)atore(m) symo(n)is cor(am) liefkenrode/ tybe oct(obris) xxvi lxxxii Sen(tentiatum) p(er) [gertrudem] relicta(m) symo(n)is cor(am) opp(endorp) nausnyde(re)/ septembr(is) ix a(nn)[o] lxxxiii